Grímulaust ofstæki gamla kommúnistaflokksins öllum ljóst

 

Það er þakkarvert að kommúnistaleiðtogi vinstri grænna skuli á landsfundinum hafa kastað grænu grímunni nægilega lengi  til að landsmenn allir hafi séð svo ekki verður um villst að vinstri menn á Íslandi hafa ekkert breyst og ekkert lært þótt bráðum verði 20 ár frá því Berlínarmúrinn féll.

 

Stórfelldri eignaupptöku er skefjalaust hótað, 5 ára dauðatímabili íslensks efnahagslífs lofað með einu allsherjar stóra stoppi í nýtingu náttúruauðæva í formi hreinnar orku. Hátekjuskattur boðaður og milljarða kosningaloforð til aldraðra og öryrkja.

 

Líklegast hefur aldrei verið boðuð jafn afdráttarlaus atlaga að lífskjörum og framtíðar hagvaxtarmöguleikum velsældarþjóðfélagsins á eyjunni bláu.Það ber að þakka eins og ég sagði hér í upphafi.Nú hafa landsmenn ítrekað fengið þefinn að því sem þeir munu búa við kjósi þeir yfir sig ríkisstjórn með þátttöku vinstri grænna.Eftirminnilegt viðtal Agnesar Bragadóttur við Steingrím J í Morgunblaðinu fyrir nokkrum dögum sýndi á nær ótrúlegan hátt hversu kaldrifjuð rökleysa og málefnagjaldþrot blasir við,er spurt er um hvernig eigi að halda áfram að byggja upp  og viðhalda heimsins bestu lífskjörum. Það reddast er inntakið í svörunum.

 

Kannski ætlar enn einu sinni að sannast að vinstri grænir ætla sér í raun og veru ekki að axla ábyrgð í ríkisstjórn.Þá líklega yrðu þeir að kyngja svo miklu af ofstækisyfirlýsingum að það gengi ekki í hinn almenna flokksins. Dettur annars nokkrum lifandi manni í hug að fjórði hver Íslendingur muni kjósa yfir sig gamlan kommúnista klofningsflokk?

 

Það var hjákátlegt að sjá Atla Gíslason kveinka sér undan kommúnistanafnbótinni í Silfri Egils í dag af vörum Jakobs Frímanns ,það var ómálefnalegt sagði lögmaðurinn snjalli og sagði svo ekki meira um það.

 

ÍNN loks á lokastefnu

Það er koma að ögurstundu hjá ÍNN, eins og sést af fyrirmælum hershöfðingjans okkar,sem allir fengu í morgun.Birti bara listann eins og hann kemur af skepnunni, sýnir svo ekki verður um villst hve mörgu þarf að hyggja að,áður en tryggt merki fer í loftið á Breiðbandið, ADSL og væntanlega Digital Ísland, auk veraldarvefsins. 

 

Minnislisti á lokaspretti INN

1) Fimmtudagur
OB in a box - annað kemur frá Nýherja
tjekka hljóðtengingar, aðrar tengingar og sérstaklega harða diskinn

Harði diskurinn tilbúinn til upptöku!

Vinna í hljóðinu - væntanlega þarf að setja "eggjabakka" til dempunar
ath. aðföng af efni

Bakljós í settið og ljós á bakgrunn - Alli

Þrífætur og stilla kamerur

Alert! allar snúrur, tengi, smádót - rífa það í hús sem eftir stendur

Monitor fyrir control (Óli Rögg á einn notaðan)

Monitor fyrir útsendingu - retur signal frá símanum

Senda test til Frosta og fá feedback

---------------

2) Föstudagur

Klára hljóðdempun

Lokatest á snúrum og upptöku á harddisk

Testupptökur - setja af amk. 2-3 tíma með fólki í setti
kl. 14:00-16:00

Senda áfram test til Frosta

----------------
Helgin - klára alla lausa enda og lokatest

----------------

Mánudagur
Fyrsti þáttur Hrafnaþings sendur út að því tilskyldu að lokatest og ofangreint sé leyst.

 

 

Bindindismaður dettur í´ða á Bessastöðum

 

Ég hef sagt það við ykkur Hrafnaþingshlustendur í mörg ár, áfengisbindindismaðurinn á Bessastöðum er fíkill af hæstu gráðu er kemur að athyglissýki.Það væri verðugt verkefni fyrir stjörnu sagnfræðinga samtímans Guðna Th Jóhannesson og Val Ingimundarson að skrifa króniku um athyglissýkifylleríin á Álftnesi,sem hafa ratað inn á síður dagblaða eða í myndver fréttastofa frá því að þjóðin kaus ábúandann.Það eru orðnir æði skrautlegir túrar þótt upp úr standi fjölmiðlafrumvarpsfarsinn.Þar sló gamli kommúnistaforinginn sjálfan sig út með eftirminnilegum hætti.

 

Ég velti því stundum fyrir mér hvort hann haldi sérstaka úrklippubók eða geymi videósafn um umfjöllun,sem þessi athyglisupphlaup hans fá.Umfjöllun sem er að mörgu leyti fyrirsjánleg.

Styrmir Gunnarsson hagræðir gleraugum á nefi sér og sest niður tölvu eða gefur fyrirmæli um staksteina- og leiðaraskrif í Mogga.Í síðasta tilfellinu útsíðufréttir bak og fyrir.Nú hefur bæst í hópinn gamli íhaldsleiðtoginn Þorsteinn Pálsson, að ekki sé minnst á fyrrum forseta alþingis Halldór Blöndal. Allt minnir þetta á málfundi í Menntaskólunum á Akureyri og Reykjavík og andleg reisn þátttakenda í samræmi við það,þótt bráðum haldi þeir upp á 50 ára stúdentsafmæli sumir hverjir í það minnsta.

 

Nú er umræðuefni málfundarins,er forsetinn deildarstjóri hjá ráðherrum eða ráðherrar hjá forsetanum? Stjórnmálaleiðtogar landsins eru leiddir á vettvang og vita ekki sitt rjúkandi ráð,meira að segja skylduræknasti framsóknarmaður heims er hálf kjaftstopp . Segist sem þegn bara ekki hafa heyrt annað eins.Hann segir hins vegar líka í Mbl,að viðbrögð hans séu á þann veg að forsetinn sé hafinn yfir deilur og dægurmál.Þarna skjátlast framsóknarformanninum hrapalega. Hið rétta er að allir aðrir forsetar lýðveldisins hafa verið það og þannig hefur hinn almenni borgari talið að það ætti að vera.

 

Á Bessastöðum situr hins vegar ábúandi og fær ókeypis afréttara dag eftir dag með fjaðrafoksskrifum fjölmiðla.Hann er fjandanum naskari að finna sér eitthvað til að koma mönnum úr jafnvægi.Verður hins vegar að segja í sanngirni að er kemur að stuðningi hans við íslensku útrásina á hann sinn ekki líkan.Sannkölluð eftirlætis plakatafyrirsæta stjórnarformanna og bankastjóra,sem fyrirvaralítið geta boðið viðskiptafélögum í kaffi og með því á Bessastöðum.

 

 

 

Heilagleiki fjölmiðla

Líklegast er nú í bili liðin hjá heilagleikafroða fjölmiðlanna þriggja,sem hafa upp á líf og dauða barist við að draga fram í sviðsljósið hverja ógæfumanneskjuna á fætur annarri,sem einhvern tíma dvaldi á opinberu heimili eða hæli frá miðri síðustu öld.Umfjöllun RÚV,Stöðvar 2 og DV hefur nær algerlega byggst á því að draga  fyrst fram meinta illa meðferð og blása sem mest út en gera að sama skapi lítið úr þeim sem hafa betri sögu að segja.Dæmi um þetta er helgarblað DV,þar sem blásin er í opnu frásögn manns,sem taldi sig aldrei hafa fengið blíðu eða ástúð frá sæmdarhjónunum í Kumbaravogi og verið misnotaður  til vinnu eins og svitabúðafólk úti í hinum stóra heimi.

 

Ég var einu sinni í félagsskap ungra manna,sem í allmörg ár seldi flugelda og notaði arðin til að gleðja krakkana í Kumbaravogi og styðja lítillega við starfið þar að öðru leyti.Ég fullyrði að það var einstakt lán fyrir þau ungmenni,sem þar voru fóstruð að njóta þeirra forréttinda að fá þar athvarf. Einstök forréttindi!! Enda kemur það fram á næstu blaðsíðu í viðtali við mann,sem sagði allt aðra sögu.Sannleikselskandi DV kaus hins vegar í soraanda Jónasar að sverta fyrst sem mest starf hjónanna,en láta síðan fylgja með að þetta hafi nú kannski ekki verið alveg sannleikanum samkvæmt.

 

Hins vegar er umfjöllunin öll sem slík þarft framtak,sem vonandi verður til þess í náinni framtíð allavega,að þeir sem veita slíkum stofnunum forstöðu í dag geri naflaskoðun og gangi úr skugga um að allt sé í velsæmis standi. Um leið og ég hrósa kollegum mínum mörgum fyrir þeirra verk, verð ég að segja að mér ofbauð á stundum hversu gagnrýnislaus viðtölin voru .

Fólk fékk athugasemdalaust að hella úr  skálum reiði sinnar vegna meintrar misnotkunar.Engin tilraun var gerð til að spyrja gagnrýnna spurninga.Allt afgreitt eins og heilagur sannleikur.Landsþekktir óforbetranlegir raðafbrotamenn sóttir heim í fangaklefa til að áhorfendur og lesendur fengju sannleikann beint í æð í beinni.

 

Í öllu þessu umvöndunaræði minnist ég  þess varla að hafa séð vangaveltur um að eitthvað af þessu liði hafi í raun verið óalandi og óferjandi jafnvel varla BUGL tækt.Það réttlætir að sjálfsögðu aldrei barsmíðar eða misnotkun.

Samfylkingin notar ógæfu ógæfufólks sér til framdráttar

 

 

Alltaf jafn merkilegt þegar þjóðin tekur sótt ef svo má að orði komast.Ég held að flestir sem þurftu að vita hafi vitað að drengir voru barðir í Breiðavík.Ég man eftir því sem polli, er því var hvíslað að þessi eða hinn hefði verið sendur vestur. Menn vissu meira að segja fyrir 40 árum að úr þeim hafði verið barin sómatilfinning. Þetta voru margir svokallaðir vandræðagemsar,sem stálu, brutu rúður, hleyptu lofti úr dekkjum og höfðu almenna ánægju af því að skemma.Foreldrar þeirra hreinlega gáfust upp,kannski sérstaklega einstæðar mæður, eins og sú sem var á annarri hvorri sjónvarpstöðinni hér um kvöldið. Einn rámar mig í,sem mig minnir að hafi búið hjá ömmu sinni.Gamla konan var að niðurlotum komin og örvinluð, er hún gafst upp og lét hann í hendur barnaverndarfólks sem áframsendi hann vestur.

 

Það skiptir í raun engu máli hversu baldnir eða ofvirkir þessir drengir voru.Meðferðin sem virðist hafa viðgengist með blessun þeirra tíma barnaverndarnefnda verður aldrei réttlætt. Það er manndómsmerki þessarar ríkisstjórnar að taka þessi mál föstum tökum, bjóða síðbúna áfallahjálp og jafnvel bætur.Það er líka gott til þess að vita að í embætti félagsmálaráðherra situr landskunnur sómadrengur, Magnús Stefánsson.Blaðamannastéttin er komin með nokkrar rósir í hnappagatið í þessu máli og máli Byrgisins,en verður eins og alltaf að gæta þess að fara ekki fram úr sjálfri sér.Að taka aðra hlið málsins og dramatísera hana svo,að fólk bara trúir því ekki þegar hinn aðilinn kemur með sína útgáfu.

 

Á sunnudagskvöldi hef ég hvergi séð eða heyrt í nokkrum fjölmiðli frá einhverjum,sem staðfesti ofbeldi.Gamli bekkjarbróðir minn úr MR Sigurður Sigurðsson vígslubiskup,starfsmaður í Breiðavík fyrir 40 árum segist hafa fengið sögur frá drengjum beint í æð og í framhaldi lagt til að vistheimilinu yrði breytt úr langtímavistun í skammtíma.Hann hefur talið að eitthvað væri hæft í þessum sögum.

 

Mikilvægast er að lexían af þessu öllu tryggi eins og hægt er  mannréttindi þeirra hundruða ógæfusömu einstaklinga sem þarf að vista á opinberum heimilum eða hælum.

 

Mikið óskaplega hraus mér hugur við sjónarspili Össurar Skarphéðinssonar í Silfri Egils í dag, þar sem hann var útbelgdur eins og púkinn á fjósbitanum að heimta afsökunarbeiðni frá ráðherrum og ríkisstjórn.Að taka svona mál og í örvæntingu reyna að gera það að kosningamáli er svona á par við meintar misþyrmingar.Samfylkingin hefur greinilega ákveðið að nota  ógæfu ógæfufólks sér til framdráttar.Ég gæti gubbað. Agli Helgasyni,helsta kynningarfulltrúa íslenskra vinstrimanna og vikulegum leiðarihöfundi þeirra,fannst þetta greinilega hið besta mál.

 

Á morgun myndir úr fullkomnu 4 myndavéla stúdíói ÍNN,sem er tilbúið til útsendingar,en nú eru forsvarsmenn Mentis ekki nægilega ánægðir með útsendingarmerkið og hafa pantað nýja búnað með hraði frá útlöndum til að tryggja fyrsta flokks útsendingu.

 

 

Galli í útsendingartölvu seinkar ÍNN

 

Framkvæmdir við útsendingar- og framleiðslustúdíó ÍNN eru nú að komast á lokastig,en galli í nýrri útsendingartölvu setti strik í reikninginn og seinkar okkur um einhverja daga. Erum búnir að panta nýja , nú frá Hewlett Packard sannkallaða völundarvél. Skiptir ekki höfuðmáli hvaða dag fyrsta Hrafnaþingið fer í loftið,aðeins að útsendingin um víðan veraldarvef  og í sjónvarpi verði í hæsta gæðaflokki.Því lofar Maríanna Friðjónsdóttir, tæknilegur ráðgjafi okkar,sem hefur hannað stöðina frá A-Ö. Þekkingin sem hún býr yfir sprengir huga gamals máladeildarstúdents úr MR.

 

Ég er búinn að starfa í sjónvarpi frá því í apríl 1979 og hef sjaldan gefið mig út fyrir að skilja tæknihlið málsins og það sem gerist fyrir aftan myndavélarnar þótt ég sé nokkuð slarkfær fyrir framan þær.Verð hins vegar að viðurkenna að ég skila minna en nokkru sinni nýju tæknina,sem við munum beita og byggir m.a. á  einhverju sem kallast græna tjaldið,green screen. Búið að klæða stúdíóveggina og gólfið með rándýrum dúk.Myndavélarnar 4 verða síðan  samhæfðar og forritaðar gegnum HP tölvuna með nýjustu tækniforritum á markaðnum til að senda út mynd í hreint ótrúlegum gæðum. Við munum geta boðið viðskiptavinum okkur upp á   “ tæknibrellur” og framleiðslu á alhliða sjónvarps og vídíóefni á par við það sem gerist í útlandinu.

 

Ætla ekki að hætta mér út í frekari skýringar,láta það eftir markaðsmönnum okkar, þegar allt verður orðið klappað og klárt.Bara til að ítreka það sem ég hef áður sagt,að ÍNN ehf verður allavega næstu misseri einkum iðnfyrirtæki við efnisframleiðslu og leigu á stúdíóaðstöðu og búnaði.Hrafnaþing verður fyrsti þátturinn sem fer í loftið,en margs konar hugmyndir eru að þáttagerð og með haustinu verðum við hugsanlega komin með 4 tíma fjölbreytta innlenda, þjóðmála- og viðskiptatengda dagskrá. Útsendingarsíðan okkar inntv.is er framleiðslu og verður til um leið og fyrsta merkið fer í loftið.

Guðjón Arnar þykist vera úti að aka

 

Það er með hreinum ólíkindum að lesa ágætt viðtal Agnesar Bragadóttur við Guðjón Arnar Kristjánsson formann Frjálslynda flokksins. Agnes sýnir enn einu sinni svo ekki verður um villst að hún er einn albesti penni og viðtalshöfundur íslenskrar blaðamannastéttar. Formaður Frjálslynda flokksins er gersamlega út á þekju í hreinum blekkingartilgangi.Hann þykist ekki skilja útlendingaandúðarstefnu flokksins,sem Magnús Þór Hafsteinsson innleiddi á dögunum og færði flokknum strax 5 prósentustiga fylgisaukningu.

 

Málflutningur þingmanna frjálslyndra er engin íslensk heimasuða heldur hnitmiðaður og þaulæfður byggður á málflutningi skandinavískra “ öfgaflokka”, með þann tilgang einan að reyna í örvæntingu að bjarga drukkandi flokki. Svona eins konar pólitískt Markúsar björgunarnet.Kvótagreifarugl þeirra er löngu úrelt.

 

Það sem kannski er merkilegast,er að þessi málflutningur er ekkert óeðlilegur. Hvað er óeðlilegt við að fólk hafi áhyggjur af óheftu streymi útlendinga inn á íslenskan vinnumarkað.Sagði mér maður sem ég hitti í Borgarnesi í dag að hann héldi að Pólverjarnir hjá Loftorku og fleiri fyrirtækjum í Borgarnesi væru farnir að slaga hátt á annað hundrað, eða sem svarar að 10. hver Borgnesingur sé af pólskum uppruna.Þar að auki væri konum að fjölga,sem væru kærkomið vinnuafl t.d í Eðalfiski og Borgarnes kjörvörum.Hann bætti við að upp til hópa væri þetta vinnusamt og nægjusamt sómafólk.

 

Væntanlega er svo um flesta farandverkmennina, en innan um eru líka skemmd epli.

Hér á landi snýst málið ekki um það. Það snýst um hvort Frjálslyndir ætli að bjarga þingsætum sínum með því að ala á tortryggni í garð þessa fólks í heild sinni með tali um berkla og aðra sjúkdóma,sem kunni að berast hingað og launalækkun hjá íslensku verkafólki vegna nægjusemi útlendinganna, er kemur að launum og aðbúnaði..Allt eru þetta mikilvæg mál,sem verður að ræða af hreinskilni.Það má hins vegar ekki láta litla persónulega klofningsflokkinn komast upp með  að reyna að bera af sér málflutning með blekkingum,málflutning sem ískalt og hnitmiðað er ætlað að bjarga tilvist hans.

 

 

 

Milljónir tonna af ís hafa ruðst niður Langá

 

Ég hef búið á Langárbökkum í 33 ár og séð hana í ýmsum útgáfum. Vatnslausa niður í harða grjót,súkkulaðibrúna í foráttuflóði og allt þar í milli.Sjaldan eða aldrei hef ég séð önnur eins ummerki eftir ísruðing,er hún fyrir einhverjum dögum hefur sprengt af sér klakabrynju kuldakaflans.Það er greinilegt að miljónir tonna af ís hafa farið hamförum frá Koteyrarbroti( veiðistaður 79) og endað annað hvort tugi metra upp á landi eða niður í Sjávarfossi.

 

Til dæmis er 10 metra hár og jafnbreiður klakaveggur frá efri Hvítsstaðahyl, (nr 40) upp beygjuna upp undir klapparhornið efst í Byrgislaut. Án rennur nú nær öllu um vesturræsið í Glanna og ca 20 metra skarð er í hólman rétt ofan við Túnsstreng ( nr 26). Komst ekki niður að Glanna til að skoða eyrasvæðið sökum þess að klakahröngl er ca 5 metra þykkt ofan á veginum.

 

Þegar maður stendur andspænis svona  náttúrhamförum, fallast  manni hálfpart hendur og maður ímyndar sér að tjónið á  lífríkinu hljóti að vera skelfilegt.En svo þegar allur þessi ís hefur bráðnað og flotið á haf út sýna rannsóknir fiskifræðinga jafnan að áin er bakkafull af seiðum af öllum árgöngum,sem einhvern veginn forða sér undan jökunum, er áin lyftir þeim og kastar niður fossa og flúðir.

 

Ég vildi sannarlega hafa upplifað þessar hamfarir nú eins og ég hef oft sinnis gert áður, heyrt dynkina, er risastórir ísjakar skella utan í klettaveggina. Vaknaði fyrir mörgum árum við slíkan hávaða og hélt að himinn og jörð væru að farast.Lá stjarfur í rúminu smástund áður en ég rauk fram úr til að kanna hvað væri á ferðinni og sá þá tuga tonna jaka kastst upp á klettabrúnina Hvítsstaðamegin við Stangarhyl.Sú  brún er líklega 5-6 mannhæðir.

 

Ég sé hins vegar fyrir mér að við Langárbændum þurfum verk að vinna við að laga veiðivegi og árbakka,sem hafa rifnað og ganga úr skugga um að gjöfulir hyljir hafi ekki fyllst af möl og þá hreinsa upp úr þeim ef svo hefur farið.

 

Þegar við fórum ofan að síðdegis fengum við í heimsókn stóran hóp af akfeitum snjótitlingum,sem hámuði í sig kræsingar úr Bónus,sem við lögðum út fyrir þá og svo komu tveir Hrafnar að sækja nokkrar brauðsneiðar sem ég hafði kastað á þeirra hefðbundna lendingarstað.Þeir krunkuðu í þakklætisskyni  og flugu vestur yfir ánna þar sem þeir settust að snæðingi.Mér varð allt í einu hugsað til þess þar sem ég stóð þarna  í ægifegurð Mýranna í norðan andvara og glampandi febrúarsól,að það eru kannski ekki nema rétt 70 dagar í fyrstu farfuglana vini okkar og innan við 100 dagar í kosningar. Hólí mólí.

Sussu sussu Jón minn elsku kallinn

 

Það liggur við að arðsemi frelsis í viðskiptum megi orðið líkja við holskeflu,sem brotnar.Sjálf mararbáran” blá”.Kaupþingsmenn geta raunverulega farið að gera eins og Jóakim frændi,fylla kjallara í Borgartúninu af  fimmþúsundköllum og kasta  sér til sunds.

 

Nýjasta gaman fjölmiðla,er að reikna út hvað væri hægt að gera við hagnað fjármálastofnana,sem væntanlega verður álíka niðurstöðutölum fjárlaga íslenska ríkisins þegar öll kurl verða komin til grafar og allir búnir að tilkynna sig.

 

Enn er þó fólk,sem jarmar hástöfum um að ríkisstjórn Sjálfstæðisflokks og  Framsóknarflokks hafi skenkt ríkisbankana,flokksgæðingum á silfurfati.Eða jafnvel að þeim hafi verið stolið fyrir augunum á alþjóð.Í dag skilar þetta “þýfi” þjóðarbúinu slíkum arði að íslenskur sjávarútvegur í heild sinni, er að verða hálfgerður rassvasabisness  í samanburði.Nýtur hann þess þó að verð á öllum afurðum er í sögulegu hámarki.

 

Mitt í þessu velmegunarússi hamast svo stjórnarandstaðan í mikilli góðsemi við að ganga milli bols og höfuðs á sjálfri sér.Meira að segja gamli fretkarlinn Jón Baldvin Hannibalsson froðufellir í Silfri Egils og beinlínis hótar Ingibjörgu Sólrúnu,sem þarf að grípa til örvæntingar “sussu sussu Jón minn elsku kallinn”.

 

Sínu verst er ástandið hjá Frjálslyndum alla vega tímabundið. Svo koma gamlingjar klofnir í herðar niður af Arndísi Björnsdóttur og Baldri Ágústssyni og hóta Sjálfstæðisflokknum.Ég held að það þurfi að fara að setja upp Spaugstofu um miðja viku til að vinna úr allri lágkúrunni og heimskunni.

 

Margir kjósendur eru að verða svo ráðalausir að þeir ganga í hópum til liðs við Alþýðubandalagið.Halda að gömlu klofningsrauðliðarnir sveipaðir grænni skykkju séu fyrirheitni flokkurinn.Vinstri fylkingin grænt framboð, eða hvað þeir nú aftur heita.Fýluflokkur Steingríms J, eftir tapið fyrir Margréti Frímansdóttur í formannskjörinu um árið.Getið þið ímyndað ykkur að fimmti hver kosningarbær Íslendingur muni kjósa 12. maí fulltrúa flokks,sem býr við algert hugmyndalegt gjaldþrot  varðandi framtíðar uppbyggingu íslensks efnahagslífs.Ekki virkja, ekki iðnvæða! Prjónum bara og róum!

 

Það er alveg skiljanlegt að sumum hrjósi hugur við fjórum árum í viðbót undir stjórnum íhalds og framsóknar.Sjá menn einhverja vænlega valkosti. Í alvöru? Forsætisráðherra hitti rækilega naglan á höfuðið í gær er hann sagði íslenskt efnahagslíf níðsterkt.Spurning heimastjórnarmanna er aðeins,getur það orðið of sterkt, svo að bresti saumar og fjármagnsflóðbylgjan kaffæri farsældar Frón?

Ertu með sjónvarpsþátt í þér fyrir ÍNN?

 

Eftir dagstöf vegna  smá tollafgreiðslusnurðu, byrjar uppsetning útsendingarstúdíós ÍNN klukkan 9 í fyrramálið.Væntanlega verður það fullbúið fyrir vikulok með 4 Sony vélum og nýjustu framleiðslutækni sem völ er á.Alvöruútsendingu ætlum við samt ekki að byrja á fyrr en hver einasti hlutur verður kominn á sinn stað og búið að stilla allt sem stilla þarf.Gæði útsendingar ÍNN eiga að  verða mikil.

 

Rétt að  ítreka að ÍNN og Hrafnaþing verða síður en svo eingöngu vefsjónvarp eins og við lögðum upp með í fyrstu. Í framhaldi hafa okkur opnast möguleikar fyrir tilstilli Mentis,að fara inn á Breiðvarpið og Adsl sjónvarpskerfi Símans. Og nú hefur jafnvel opnast möguleiki á enn meiri dreifingu. Það lítur sem sé út fyrir að ÍNN og okkar þættir allir verði aðgengilegir flestum sjónvarpsnotendum  um landið vítt og breitt.

 

Væntanlega byrjum við dagskrárgerðina milli klukkan 16 og 18  með hefðbundnu Hrafnaþingi með einræðu og síðan spjalli við áhugavert fólk á öllum sviðum íslensks þjóðlífs, þótt pólitíkin verði nokkuð áberandi. Í framhaldi á seinni tímanum er á teikniborði hjá okkur frétta og viðskiptatengdur þáttur í samstarfi við annan öflugan fjölmiðil ef um semst.Þessi þáttur færi síðan í endursýningu milli klukkan 18 og 20 og svo aftur á miðnætti og milli klukkan 8 og 10 morguninn eftir.

 

Þegar okkur svo vex ásmegin,bætum við klukkutíma eða hálftíma framan.Allt verður þetta gert af skynsemi og innan fjárhagsramma. Ég og Ingvi Örn framkvæmdastjóri ÍNN erum hins vegar sannfærðir um að það er fullt af fólki út í þjóðfélaginu,sem er með hugmyndir að sjónvarpsefni,sem ekki hefur hlotið hljómgrunn hjá hefðbundnu stöðvunum,sem eru bundnar við ákveðinn dagskrárramma.Þannig lá alveg fyrir að Hrafnaþing ætti ekki heima innan dagskrárstefnu Stöðvar 2, er NFS leið undir lok.

 

Við ætlum að opna ÍNN rásina fyrir innlendu sjónvarpsefni og getum fyrir rétt efni boðið útsendingu á besta tíma milli 8 og 10 á kvöldin.Við bjóðum upp á þáttaframleiðslu og útsendingu gegn ákveðinni greiðslu. Aðilar geta síðan sjálfir fundið sér kostun og selt auglýsingar inn í sína dagskrá.Þannig geta félagasamtök,stjórnmálaflokkar,fyrirtæki ,stofnanir og jafnvel einstaklingar komið til ÍNN,pantað þáttaframleiðslu og útsendingu að þörfum.Auðvitað innan eðlilegra velsæmismarka.ÍNN verður sem sagt eins konar regnhlíf yfir mörg framleiðslufyrirtæki og ekki bundið af hlutleysis- eða jafnræðiskvöðum.Þannig gæti Alcan framleitt hjá okkur og sent út vikulega þætti fram að atkvæðagreiðslu til að kynna sín sjónarmið.Andstæðingar stækkunar gætu þá ef þeir vildu keypt þætti til að vera á öndverðum meiði.

 

Hugmyndirnar þróast hins vegar hratt hjá okkur og við munum er líður á vikuna kynna nánar möguleika sem opnast í dagskrárgerð með tilkomu ÍNN.