Laxamýrarhangikjöt og sonarheimtur

Jólin eru í höfn á mínu heimili flott og fín. Atlantaflugmaðurinn okkar Hafsteinn Orri lenti á Keflavík um fjögurleytið í morgun í snarvitlausu veðri eftir nær látlaust 20 tíma flug.Fyrst með fulla Boeing 747 af pílagrímum frá Indónesíu til Jedda  og svo farþegi frá Jedda til London eftir smálúr til að ná jólum og áramótum heima áður en byrjað verður að flytja pílagrímana til sins heima í fyrstu viku nýja ársins.Það var mikill léttir að vita af honum á eyjunni bláu,allir búnir að vera með hnút í maga yfir þokunni á Heathrow,að hann hreinlega kæmist ekki heim.Eini áhyggjulausi fjölskyldumeðlimurinn,Ingvi Hrafn Hafsteinsson 2ja ára,sem er ekki farinn að fatta þriggja vikna heim og heiman skiptingu föður sins.Vill til að móðir hans Kristín Berta Sigurðardóttir er sjómannsdóttir frá Patró,alin upp við langar föðurfjarvistir í Norðursjó,kann þetta frá A-Ö,en þau hjónakornin geta líka Skypað oft á dag,kostar ekki krónu með gati.

 

Til að innleiða jólastemminguna suðum við heimareykta Laxamýrarhangikjötið,sem við fáum árlega frá vinkonu okkar frú Jónu á Laxamýri í vöruskiptum. Maður stendur yfir lærinu beint úr pottinum og rífur glóðvolgt kjötið af beini , treður upp í sig með laufabrauði og þverhandarþykkri smjörklípu og skolar svo öllu niður með ískaldri malt og appelsínblöndu. Ég veit ekki hvort lífið gerist öllu betra, nema ef vera skyldi rjúpur á aðfangadagskvöldi.

 

Á Jóladag fer svo stórfjölskyldan að Langárbökkum og eyðir jólarrest við bókarlestur og veisluhöld við árnið eins og í vorleysingum eftir rigningar síðustu daga. Gleðileg jól öllu sömun og þakka ykkur 4500 talsins,sem heimsóttuð ÍNN síðuna í gær,ég er hreinlega þrumlostinn.Hafði áður fengið 450 heimsóknar á bloggið mitt á Visir.is á 6 vikum

Það sést í gegnum Jón Baldvin

Merkilegt þegar margra barna feður og afar láta fjölskyldu sína verða vitni að opinberum ósannindum, vil ekki nota sterkari orð. Nú talar Jón Baldvin Hannibalsson um rannsókn sýslumannsins á Akranesi sem sýndargjörning, lýgur upp á þennan ágætis embættismann að hann sé eitthvert handbendi einhverra samsærisafla, líklega 1000 manna hlerunardeildar sjálfstæðisflokksins. Eini sýndargjörningurinn, er þessi upplogni lögreglumaður, sem utanríkisráðherrann fyrrverandi bjó til sem heimildarmann, sem sýslumaðurinn á Akranesi fékk ekki að hitta. Ég lýsti því yfir frá fyrsta degi, er ósannindin hófust, að þessi fake pólísman, sem átti að hafa barið á framdyrnar hjá Búlgaranum Hideout, væri nákvæmlega það,”feik”og myndi aldrei fá að sjá dagsins ljós. Svo vill þessi annars ágæti maður láta taka sig alvarlega sem akademiker.

ÍNN Í LOFTIÐ Í JANÚAR

 

 

Það eru fleiri asnar í fjölmiðlun en þeir sem ætla að sturta milljónatugum niður prentmiðlaklósettið enn einn ganginn með gamla bátsmenn í brúnni sem eira illa í plássi.

Ég er sjálfur búinn að stofna ásamt Ingva Erni, syni mínum fyrirtækið ÍNN, Íslands nýjasta nýtt, ehf til að annast vef og sjónvarpsútsendingar í samstarfi við Mentis og breiðbands og adsl þjónustu Símans og ætlunin að fara í loftið um eða upp úr bóndadegi.

Besta vöggugjöf nýja fyrirtækisins var auðvitað að kúnnarnir okkar voru af Time valdir menn ársins og svo nýja tæknin, sem millifærir af tölvuskjá í fullum digitalgæðum á sjónvarpsskjáinn. Allur okkar tækjabúnaður verður sjálfvirkur og sáraeinfaldur, en myndgæðin ótrúleg. Segi ykkur þetta svona í jólaforbifarten, því hvar sem ég er og fer eru allir að spyrja hvort Hrafnaþing sé ekki á leiðinni í loftið á ný. Ég lofa ykkur því að þið farið ekki í kosningar 140 daga inn í nýtt ár öðru vísi en málefnin hafi verið brotin rækilega til mergjar tæpitungulaust a la hrafninn þar sem ábyrgðarleysi vinstri villunnar verður afhjúpað sem aldrei fyrr í umleitan til að forðast tsunami 12. maí.

En auk Hrafnaþings verður fjölbreytt 100% íslensk dagskrá á ÍNN. Hversu umfangsmikil hún verður mun sjálfsagt ráðast af því hvernig sjálfstæðisflokkurinn afgreiðir Sikileyjarfrumvarpið um RÚV, sem mun gera Pál Magnússon að sannkölluðum Corleone. Guðföður sem mun beita öllum brögðum öðru en morðum til að raka fé til ohf.

Hvað mér fannst um Kompásþáttinn, ég gekk út úr sjónvarpsstofunni og skammaðist mín einlæglega fyrir vinnubrögðin, sem voru einfaldlega viðbjóðsleg. Kæmi mér ekki á óvart að umsjónarmaður og hans yfirmaður yrðu dæmdir til að greiða hæstu bætur Íslandssögunnar.

Nasaþefur af mokstri vinstri manna úr ríkissjóði

Við sem þykjumst eitthvað hafa um stjórnmál að segja og flokkum okkur undir merkjum bláu handarinnar, höfum með samúð og skilningi fylgst með pólitískum fjörbrotum gamla kratafretkarlsins Jóns Baldvins Hannibalssonar. Hann hlýtur að standa felmtri sleginn, er hann virðir fyrir sér mannvalið, sem býður þjóðinni starfskrafta sína á framboðslistum Sjálfstæðisflokksins í komandi kosningum.

Að auki hafa samfylkingarmenn ekkert hlustað á þennan gamla krataforingja sem hefur farið hamförum, í öllum þeim spjallþáttum, sem nenntu að fá hann og röð blaðagreina. Árangurinn af þessum fjörbrotum? Enginn!

Mér er á margan hátt hlýtt til Jóns Baldvins, hann hefur sannarlega verið litríkur og skemmtilegur stjórnmálamaður, sem áreiðanlega var líka einlægur hugsjónamaður og er sjálfsagt enn. Mér finnst bara óþolandi að hann eins og Davíð Oddsson, skuli ekki skynja að þeirra pólitíski ferill er kominn í þátíð og þeir þurfa að leyfa pólitík nútímans að fá að þróast í friði, án þeirrar íhlutunar.

Ég hef löngum á Hrafnaþingi varað við efnahagsöngþveiti, ef Íslendingar taka upp á að leika í rússneskri rúlettu um fjöreggið sitt og kjósa yfir sig vinstri stjórn. Aldrei í Íslandssögunni hefur slík ríkisstjórn skilið annað eftir sig en efnahagsöngþveiti, óðaverðbólgu og fjöldagjaldþrot. Menn hafa verið að berja á mér fyrir fortíðarrugl.

Þurfa menn frekari sannana við, en að líta á tillögur stjórnarandstöðunnar við afgreiðslu fjárlaga, þar sem bótaþegum og þeirra væntanlegu framtíðarkjósendum er lofað auka 9 milljörðum úr ríkissjóði. Allar vilja að bræður og systur okkar sem minna mega sín fái að lifa mannsæmandi lífi innan þeirra marka,sem velferðarkerfið kveður á um. Þeim er enginn greiði gerður með innantómu loforði um gullpott úr ríkissjóði ef frú Ingibjörg, Steingrímur og Addi Kittu Gau fá að setjast að kjötkötlum. Í dag er hér vestra Þakkargjörðardagur og kalkúnum slátrað í milljónatali. Ég sendi þakkir austur yfir haf fyrir ríkisstjórn, sem hefur leitt þjóð sína inn í mestu velsældartíma sem sögar fara af.

Davíð að verða yfirforsætisráðherra ?

Sit hér í Hrafnaþingssumarfríi á Key Largo á Flórída á sjálfan kosningadaginn í meintri vöggu lýðræðisins, hálf felmtri sleginn. Ekki yfir því að innan við helmingur 200 milljóna kjósenda nenni á kjörstað, heldur heiftinni og illviljanum í útvarps og sjónvarpsauglýsingum, sem flokkar og frambjóðendur eyddu um 120 milljörðum íslenskra króna í. Hólí mólí,kosningabarátta á Íslandi verður að hreinu KFUM dæmi í samanburði.

Hef verið hugsi yfir ásökunum um einhverja aðför að Birni Bjarnasyni í prófkjöri okkar sjálfstæðismanna á dögunum. Hlýt að vera verr upplýstur en ég hef haldið, eða bara utangátta. Ég bara sá ekki þá aðför, sem kallaði á einhverja sérstaka stuðningsyfirlýsingu Geirs Haarde. Björn Bjarnason hefur í ráðherrastörfum mælt fyrir ýmsum aðgerðum í öryggismálum þjóðarinnar,sem í eðli sínu eru umdeildar, auk þess að vera af mörgum talinn síðasti móhíkani kaldastríðsáranna.

Björn lagði þessi störf undir dóm sjálfstæðismanna í Reykjavík og fékk hreina og klára traustsyfirlýsingu. Það að myndarlegur hópur sjálfstæðismanna kallaði á Guðlaug Þór Þórðarson til frekari trúnaðarstarfa verður seint talin “innanflokksaðför” að hæstvirtum dómsmálaráðherra, eins og hann í einhverju ólundarkasti er að reyna að selja okkur sjálfstæðismönnum. Ég er persónulega ekki frá því að hann hefði átt að láta hér við sitja eftir 16 ára þingmennsku eins og hann segist hafa hugleitt. Ég hef sagt það áður að langsetnir ráðherrar á sjötugsaldri eiga alls enga forgangskröfu á áframhaldandi ráðherraembætti. Kannski á það fyrir Birni að liggja að ljúka ferlinum eins og frændi hans, í þingforsetastóli. Hann myndi sóma sér þar vel eins og hann hefur gert í öllum störfum fyrir fólkið, sem býr á eyjunni bláu.

Flestir vita að ég hef verið einn dyggasti stuðningsmaður Davíðs Oddssonar gegnum árin og honum á að reisa styttur fyrir framsýni og djörfung í að losa íslensku þjóðina úr viðjum hafta og óðaverðbólgu og búa henni mestu velsæld Íslandssögunnar. Frelsisvæðing fjármála og atvinnulífs á sér vart hliðstæðu, það svo að Davíð sjálfur virðist á stundum óttast þetta nýfengna frelsi. Látum það liggja á milli hluta. Það sem veldur mér hugarangri,er að þessi ágæti maður virðist hafa gleymt því að hann er hættur stjórnmálaafskiptum. Mér sýnist hann vera þungt haldinn af fráhvarfseinkennum eftir að hafa verið óskasveinn þjóðarinnar í aldarfjórðung. Hann er að búa sér til einhvers konar yfirforsætisráðherraembætti og notar stýrivaxtauppstönd til að gagnrýna eftirmann sinn til hægri og vinstri. Gersamlega óþolandi. Síðast í morgun á einhverjum fundi túlka fjölmiðlar orð hans sem hótanir um vaxtahækkanir. Svo skammast hann út í eitt út í matarskattalækkanir og annað, sem ríkisstjórn Geirs Haarde hefur á stefnuskrá.

Davíð Oddsson á að hafa vit á að hætta þessum uppistöndum. Seðlabankinn getur hæglega komið sínu mati á efnahagsmálum þjóðarinnar á framfæri öðru vísi en með reglulegum beinum útsendingum formanns bankastjórnarinnar og gróflegri íhlutun hans í landsstjórnina.