ÍNN Í LOFTIÐ Í JANÚAR

 

 

Það eru fleiri asnar í fjölmiðlun en þeir sem ætla að sturta milljónatugum niður prentmiðlaklósettið enn einn ganginn með gamla bátsmenn í brúnni sem eira illa í plássi.

Ég er sjálfur búinn að stofna ásamt Ingva Erni, syni mínum fyrirtækið ÍNN, Íslands nýjasta nýtt, ehf til að annast vef og sjónvarpsútsendingar í samstarfi við Mentis og breiðbands og adsl þjónustu Símans og ætlunin að fara í loftið um eða upp úr bóndadegi.

Besta vöggugjöf nýja fyrirtækisins var auðvitað að kúnnarnir okkar voru af Time valdir menn ársins og svo nýja tæknin, sem millifærir af tölvuskjá í fullum digitalgæðum á sjónvarpsskjáinn. Allur okkar tækjabúnaður verður sjálfvirkur og sáraeinfaldur, en myndgæðin ótrúleg. Segi ykkur þetta svona í jólaforbifarten, því hvar sem ég er og fer eru allir að spyrja hvort Hrafnaþing sé ekki á leiðinni í loftið á ný. Ég lofa ykkur því að þið farið ekki í kosningar 140 daga inn í nýtt ár öðru vísi en málefnin hafi verið brotin rækilega til mergjar tæpitungulaust a la hrafninn þar sem ábyrgðarleysi vinstri villunnar verður afhjúpað sem aldrei fyrr í umleitan til að forðast tsunami 12. maí.

En auk Hrafnaþings verður fjölbreytt 100% íslensk dagskrá á ÍNN. Hversu umfangsmikil hún verður mun sjálfsagt ráðast af því hvernig sjálfstæðisflokkurinn afgreiðir Sikileyjarfrumvarpið um RÚV, sem mun gera Pál Magnússon að sannkölluðum Corleone. Guðföður sem mun beita öllum brögðum öðru en morðum til að raka fé til ohf.

Hvað mér fannst um Kompásþáttinn, ég gekk út úr sjónvarpsstofunni og skammaðist mín einlæglega fyrir vinnubrögðin, sem voru einfaldlega viðbjóðsleg. Kæmi mér ekki á óvart að umsjónarmaður og hans yfirmaður yrðu dæmdir til að greiða hæstu bætur Íslandssögunnar.

Athugasemdir

[Gísli (IP-tala skráð) 22.12.2006 kl. 21:59]

Ég var, satt að segja, að vona að þú værir horfinn sjónum landsmanna fyrir fullt og allt þ.e.a.s. svona opinberlega talað!  Megir þú annars lifa sem lengst, svona prívat séð. Hins vegar eiga svona kjaftaskar, eins og þú, helst að halda sig niðri í káetu.  Það fer þeim best.

Þú ert svona álíka merkilegur og Rush nokkur Limbaugh sem lætur vaðalinn vella reglulega á öldum ljósvakans fyrir vestan haf.  Ó, hvað ég vildi að svoleiðis kjánar hættu að bera sauðheimsku sína.  Gleðileg jól þú mikla kjánaprik.

[Halldór (IP-tala skráð) 23.12.2006 kl. 01:30]

Ég gleymi því aldrei þegar ég heyrði þig taka viðtal við Ástþór Magnússon í útvarpinu og æsingur þinn í að reyna að koma Ástþóri úr jafnvægi varð svo mikill að ekki var annað hægt en að brosa að því hversu veruleikafirrtur maður þú ert, Ingvi Hrafn. Þennan dag varð mér ljóst að þótt Ástþór teljist létt geggjaður þá slærð þú hann út.

[Geir (IP-tala skráð) 26.12.2006 kl. 04:13]

Fjölmiðlar eru aldrei "hlutlausir" frekar en fréttamenn sem skoðanakannamælast iðulega mun vinstrisinnaðri í stjórnmálaskoðunum en almenningur annar. Gangi þér vel að tala tæpitungulaust. Á því er mikil þörf!