Efnahagslegur kjarnorkuvetur í boði VG

 

Jafet Ólafsson fyrrum framkvæmdastjóri  verðbréfastofunnar VBS fjárfestingabanka kominn aftur á Hrafnaþing. Starfar nú sem ráðgjafi fyrirtækisins og stjórnarmaður. VBS var að sameinast verðbréfastofu sparisjóðanna og  þetta litla snotra fyrirtæki sem Jafet setti á stofn fyrir nokkrum árum er metið á 9 milljarða.Hann hefur því gengið götuna til góðs í íslensku viðskiptalífi og mun reglulega miðla Hrafnaþingsáhorfendum af þekkingu sinni og gefa góð ráð með  hvernig best er að ávaxta milljónina undir koddanum.

 

Ég veit ekki hversu margir horfðu á Silfur Egils á sunnudaginn og urðu vitni að Staliniskri efnahagslegri aftöku  verkalýðsleiðtogans Ögundar Jónassonar á vonum Norðlendinga  um betri lífskjör með jarðvarmanýtingu. Það er auðvitað að segja ef rúmlega 4ði hver Íslendingur verður svo af göflum gengin 12. maí að hann greiði VG atkvæði sitt í kjörklefanum.

 

Húsvíkingurinn knái fékk hreint og klárt svar við spurningunni,ætla Vinstri grænir að leggjast gegn stóriðju á Bakka við Húsavík ,sem yrði knúinn jarðvarmaorku úr héraði. “Já”. Ekkert kannski, ekkert lítum á málin,einfaldlega eitt stórt stopp. Það er vonandi að Húsvíkingar og aðrir hugsandi menn í héraði formanns VG greiði atkvæði í ljósi þessarar skýru yfirlýsingar.

 

 

Og ekki bara þeir, allir kjósendur,sem ekki eru blindaðir af sýndarmennsku og ósannindum talsmanna VG,sem vísvitandi blekkja fólk til fylgis með því að segja að stóriðjustoppi fylgi alls engin efnahagsleg hnignun, þvert á móti,það sé hægt að hafa stórtekjur af því að sýna ferðamönnum kalda eyðisanda og aðrar ferðmýrar.

 

Þið liggur við að fylgisaukning vinstri grænna sé hætt að vera fyndin og allt í einu setji að manni hroll við tilhugsun um að þetta fólk gæti komist til áhrifa í þjóðfélaginu og kallað yfir okkur kjarnorkuvetur í efnahagsmálum.

 

Vestfirðingar hafa gripið til betlistafs. Ég hef stundum sagt það á hrafnaþingi gegnum árin að það megi til sanns vegar færa að Vestfjarðakjálkinn hafi dottið af Íslandskortinu.Einhvern veginn misstu stjórnvöld áhuga á Vestfjörðum eftir að þeir í stórum stíl seldu frá sér björgina og fluttust suður, til Kanarí og Flórída. Nú ákalla þeir sem eftir sitja stjórnvöld korteri fyrir kosningar um einhverja mola af gnægtarborðum.Allt þetta kemur til vegna þess að Marel þarf að hagræða og loka starfsstöðinni á Ísafirði.Allir muna eftir Samherjayfirlýsingunni Guggan verður áfram gul þegar feðgarnar fræknu og fjölskyldur þeirra seldu.Sama máttu menn segja sér að gæti gerst með Marel.

 

Þessi neyðarfundur Ísfirðinga er afar eðlilegur rétt fyrir kosningar og eins eru viðbrögð stjórnmálamanna eðlileg ,allir vilja skoða mál vestfirðinga með opnum huga.Það eru hins vegar engar ölmusulausnir handbærar.Haldiði að ráðherrarnir kjördæmisins báðir tveir, sjávarútvegs og samgöngu væru ekki löngu búnir að opna ríkishirslur ef fyrir því væru einhver fordæmi.Það væri auðvitað hægt að úthluta heimabundnum neyðarkvóta,sem þá yrði væntanlega að taka af einhverjum sem hafa keypt hann.Gengur einfaldlega ekki að gefa slíkt fordæmi.

 

Hvernig getur staðið á því að ekki er hægt að fá fleiri ferðamenn til Vestfjarða.Af þeim langleiðina í hálfa milljón ferðamanna sem búist er við til landsins í ár fara örfá þúsund til Vestfjarða.Vestfirðir ættu að vera skólabókardæmi til að sanna eyðisandatekjukenningu vinstri grænna.Allir þessir endalausu firðir og fjallgarðar, fossar og fjallalækir, mosar og fjallagrös.Heiðarvötn og hindurvitni.Aðekki sé talað um fjallvegina fínu.Af hverju stendur gamall skólabróðir minn frá Núpi Jón Bjarnason fyrrum Hólarektor og borar eiginlega ráðalaus í nefið  á sér eða kannski frekar rífur í skegg sitt og veit ekki sitt rjúkandi ráð annað en segja þetta er allt ríkinu að kenna.

 

 Enn ein sönnunin um málefnagjaldþrot vinstri grænna,sem kunna ekkert annað en vera á móti öllu og öllum.Þeir eru nefnilega í endalausri andófspólitík og niðurrifspólitík.Þess vegna er svo erfitt að skilja að það skuli vera svona margir heimskir íslenskir kjósendur, eða kannski bara svona lygnir er kemur að skoðanakönnunum.

 

Það eru ekki til neinar ölmusulausnir fyrir Vestfirðinga.Þeir sem vilja búa fyrir vestan þurfa einfaldlega að finna upp leiðir til að hafa í sig og á. Það er allt í lagi að veita þangað fjármagni, ef menn finna til þess arðbærar leiðir. Það er meira en sjálfsagt að forgangsraða samgönguframkvæmdum til Veastfjarða.

 

Þar eru sannanlega einhverjir skelfilegustu þjóðvegir landsins og sannkölluð þjóðarskömm.En þeir eru líka sáralítið notaðir því það hafa svo fáir áhuga á að fara vestur eins og tölur sanna.Þar er líka lítið um gistimöguleika utan Ísafjarðar,ef sumarhótel á Núpi er undanskilið.

 

Það þarf því að taka til hendinni fyrir vestan og það eru ýmsir að taka til hendinni, heimamenn og aðfluttir.Til dæmis er von á jafnvel þúsundum þjóðverja til sjóstangaveiði,sem gætu innan tíðar orðið fleiri en stangaveiðimennirnir.Ég las nýlega um auðjöfur í Chile,sem siglir um firði landsins með fluguveiðimenn og tekur 15 þúsund dollara fyrir vikuna.Hvers vegna skyldi ekki vera hægt að veiða á flugu í sjónum eins og ánum.Má bjóða einhverjum stórlúðu á rauðan Frances.

 

Ég talaði áðan um heimska kjósendur,sem ætla í stórum stíl að ganga til liðs við niðurrifsstefnu Vinstri grænna,nema þeir ljúgi í skoðanakönnunum.Ég hallast að því að margir þeirra hljóti að koma úr röðum íslenskra jeppa og vélsleðamanna,sem árið um kring spila rússneska rúlettu með íslensku veðurspánna,sem þeir segja að sé svo óáreiðanleg að það taki ekki að hlusta á stormviðvaranir.En björgunasveitir bjarga jafnt fíflum sem okkur hinum og taka ekkert fyrir annað en rakettupeninga um áramót.