Bindindismaður dettur í´ða á Bessastöðum

 

Ég hef sagt það við ykkur Hrafnaþingshlustendur í mörg ár, áfengisbindindismaðurinn á Bessastöðum er fíkill af hæstu gráðu er kemur að athyglissýki.Það væri verðugt verkefni fyrir stjörnu sagnfræðinga samtímans Guðna Th Jóhannesson og Val Ingimundarson að skrifa króniku um athyglissýkifylleríin á Álftnesi,sem hafa ratað inn á síður dagblaða eða í myndver fréttastofa frá því að þjóðin kaus ábúandann.Það eru orðnir æði skrautlegir túrar þótt upp úr standi fjölmiðlafrumvarpsfarsinn.Þar sló gamli kommúnistaforinginn sjálfan sig út með eftirminnilegum hætti.

 

Ég velti því stundum fyrir mér hvort hann haldi sérstaka úrklippubók eða geymi videósafn um umfjöllun,sem þessi athyglisupphlaup hans fá.Umfjöllun sem er að mörgu leyti fyrirsjánleg.

Styrmir Gunnarsson hagræðir gleraugum á nefi sér og sest niður tölvu eða gefur fyrirmæli um staksteina- og leiðaraskrif í Mogga.Í síðasta tilfellinu útsíðufréttir bak og fyrir.Nú hefur bæst í hópinn gamli íhaldsleiðtoginn Þorsteinn Pálsson, að ekki sé minnst á fyrrum forseta alþingis Halldór Blöndal. Allt minnir þetta á málfundi í Menntaskólunum á Akureyri og Reykjavík og andleg reisn þátttakenda í samræmi við það,þótt bráðum haldi þeir upp á 50 ára stúdentsafmæli sumir hverjir í það minnsta.

 

Nú er umræðuefni málfundarins,er forsetinn deildarstjóri hjá ráðherrum eða ráðherrar hjá forsetanum? Stjórnmálaleiðtogar landsins eru leiddir á vettvang og vita ekki sitt rjúkandi ráð,meira að segja skylduræknasti framsóknarmaður heims er hálf kjaftstopp . Segist sem þegn bara ekki hafa heyrt annað eins.Hann segir hins vegar líka í Mbl,að viðbrögð hans séu á þann veg að forsetinn sé hafinn yfir deilur og dægurmál.Þarna skjátlast framsóknarformanninum hrapalega. Hið rétta er að allir aðrir forsetar lýðveldisins hafa verið það og þannig hefur hinn almenni borgari talið að það ætti að vera.

 

Á Bessastöðum situr hins vegar ábúandi og fær ókeypis afréttara dag eftir dag með fjaðrafoksskrifum fjölmiðla.Hann er fjandanum naskari að finna sér eitthvað til að koma mönnum úr jafnvægi.Verður hins vegar að segja í sanngirni að er kemur að stuðningi hans við íslensku útrásina á hann sinn ekki líkan.Sannkölluð eftirlætis plakatafyrirsæta stjórnarformanna og bankastjóra,sem fyrirvaralítið geta boðið viðskiptafélögum í kaffi og með því á Bessastöðum.

 

 

 

Athugasemdir

[Þóra Guðmundsdóttir, 20.2.2007 kl. 14:21]

Æ góði Ingvi Hrafn, farðu nú að slaka á. Það er kominn tími til og þó fyrr hefði verið að þú sættir þig við að Ólafur Ragnar er forseti.

Ég veit vel að það er fúlt það voru regin mistök að kjósa pólitíkus  í þetta embætti.

En þú og Halldór Blöndal eru  bara farnir að vera kjánalegir í þessu brölti ykkar. Ef þetta er satt sem þú segir um athygglissýkina þá eruð þið bara í því að næra hana.

[Steini Briem (IP-tala skráð) 20.2.2007 kl. 15:06]

Ég held að athyglissýkina hafi nú aldrei vantað hjá Ingva Hrafni og ekki fer hún minnkandi.

[Hjörtur (IP-tala skráð) 20.2.2007 kl. 19:04]

talandi um að skjóta sjálfan sig í fótinn....

[Yngvi Högnason, 20.2.2007 kl. 19:35]

Sumt er aldrei hægt að sætta sig við,þó að farið sé með æðruleysisbænina.

[Benson (IP-tala skráð) 20.2.2007 kl. 21:40]

Hávært tal er heimskra rök.
Hæst í tómu bylur.
Oft er viss í sinni sök
sá, er ekkert skilur.

Þessi staka Arnar Arnarsonar er eins og klæðskerasaumuð lýsing á Ingva Hrafni.

[Guðmundur Sigurðsson (IP-tala skráð) 20.2.2007 kl. 22:56]

Verð að segja að það er yndislegt að sjá þig tala um athyglissýki. man ekki hvernig sagan var um snöruna og hengdsmanns húsið.

[níels a. ársælsson (IP-tala skráð) 21.2.2007 kl. 01:00]

Kjaftaskur og leiðindarskjóða Ingvi Hrafn.

[Gísli Sigurðsson, 21.2.2007 kl. 10:03]

Ég held að Ingvi Hrafn væri fínn húsbóndi á sínu heimili ef hann væri múslimi. Allar kerlingar í búrku af bestu gerð og enginn talar nema hann gefi leyfi.