Sussu sussu Jón minn elsku kallinn

 

Það liggur við að arðsemi frelsis í viðskiptum megi orðið líkja við holskeflu,sem brotnar.Sjálf mararbáran” blá”.Kaupþingsmenn geta raunverulega farið að gera eins og Jóakim frændi,fylla kjallara í Borgartúninu af  fimmþúsundköllum og kasta  sér til sunds.

 

Nýjasta gaman fjölmiðla,er að reikna út hvað væri hægt að gera við hagnað fjármálastofnana,sem væntanlega verður álíka niðurstöðutölum fjárlaga íslenska ríkisins þegar öll kurl verða komin til grafar og allir búnir að tilkynna sig.

 

Enn er þó fólk,sem jarmar hástöfum um að ríkisstjórn Sjálfstæðisflokks og  Framsóknarflokks hafi skenkt ríkisbankana,flokksgæðingum á silfurfati.Eða jafnvel að þeim hafi verið stolið fyrir augunum á alþjóð.Í dag skilar þetta “þýfi” þjóðarbúinu slíkum arði að íslenskur sjávarútvegur í heild sinni, er að verða hálfgerður rassvasabisness  í samanburði.Nýtur hann þess þó að verð á öllum afurðum er í sögulegu hámarki.

 

Mitt í þessu velmegunarússi hamast svo stjórnarandstaðan í mikilli góðsemi við að ganga milli bols og höfuðs á sjálfri sér.Meira að segja gamli fretkarlinn Jón Baldvin Hannibalsson froðufellir í Silfri Egils og beinlínis hótar Ingibjörgu Sólrúnu,sem þarf að grípa til örvæntingar “sussu sussu Jón minn elsku kallinn”.

 

Sínu verst er ástandið hjá Frjálslyndum alla vega tímabundið. Svo koma gamlingjar klofnir í herðar niður af Arndísi Björnsdóttur og Baldri Ágústssyni og hóta Sjálfstæðisflokknum.Ég held að það þurfi að fara að setja upp Spaugstofu um miðja viku til að vinna úr allri lágkúrunni og heimskunni.

 

Margir kjósendur eru að verða svo ráðalausir að þeir ganga í hópum til liðs við Alþýðubandalagið.Halda að gömlu klofningsrauðliðarnir sveipaðir grænni skykkju séu fyrirheitni flokkurinn.Vinstri fylkingin grænt framboð, eða hvað þeir nú aftur heita.Fýluflokkur Steingríms J, eftir tapið fyrir Margréti Frímansdóttur í formannskjörinu um árið.Getið þið ímyndað ykkur að fimmti hver kosningarbær Íslendingur muni kjósa 12. maí fulltrúa flokks,sem býr við algert hugmyndalegt gjaldþrot  varðandi framtíðar uppbyggingu íslensks efnahagslífs.Ekki virkja, ekki iðnvæða! Prjónum bara og róum!

 

Það er alveg skiljanlegt að sumum hrjósi hugur við fjórum árum í viðbót undir stjórnum íhalds og framsóknar.Sjá menn einhverja vænlega valkosti. Í alvöru? Forsætisráðherra hitti rækilega naglan á höfuðið í gær er hann sagði íslenskt efnahagslíf níðsterkt.Spurning heimastjórnarmanna er aðeins,getur það orðið of sterkt, svo að bresti saumar og fjármagnsflóðbylgjan kaffæri farsældar Frón?

Athugasemdir

[Yngvi Högnason, 30.1.2007 kl. 21:01]

Skýrt og skorinort, takk fyrir.

[Haukur Nikulásson, 31.1.2007 kl. 08:42]

(Hætti við að skrifa það sem ég hugsaði - Held að þú ættir stundum að gera það líka!)

[Svavar Friðriksson (IP-tala skráð) 31.1.2007 kl. 10:48]

En það er samt viðbjóðslegt að hugsa til þess að á meðan bankarnir mala gull þá þurfum við kúnnarnir ennþá að borga okurvexti af lánum, fá ábyrgðarmenn fyrir öllu og veðsetningar í steinsteypu.  Höfum ekki einu sinni val um erlenda lántöku nema að mjög takmörkuðu leyti.  Ég óska eftir erlendum banka hingað til lands.

[Haraldur Haraldsson, 31.1.2007 kl. 19:47]

Eg er algeralega sammála Svavari hérna,og að  flestu hjá  þér Ingvi Hrafn

[Jón Gunnar Kristinsson, 12.2.2007 kl. 22:54]

Veit eiginlega ekki hvers vegna ég er eitthvað að tala hérna en það er samt margt gott sem þú segir. Það er hins vegar svona tal eins og þetta hérna (Hrafn skrifar "Ekki virkja, ekki iðnvæða! Prjónum bara og róum!") sem fær mig til að fyllast megnri andúð á málflutningi þínum. Þú veist sjálfur vel að það er ekki svona sem þetta fólk talar eða hugsar. Það er því miður ekki hægt að taka þig alvarlega.  Ég er eiginlega sammála Hauki hér að ofan.

Kv. Jón Gunnar Kristinsson (þriggja barna faðir sem sér ekki mikið af góðærinu eða gróðærinu en kvartar ekki)